МРТ учун 25% чегирма 18:00 дан кейин. Бизнинг хирургия маркази халқимиз учун шанба куни қўшимча фаолият юритади.

Юлдашев Ж.М. авторефератининг сўнгги таҳрири

09.11.2026

Эркаклар бепуштлигида микрохирургик варикоцелэктомия натижалари ва самарадорлигини баҳолаш

Юлдашев Жасур Мансурович томонидан тайёрланган тиббиёт фанлари бўйича фалсафа доктори (PhD) диссертацияси авторефератида эркаклар бепуштлигини даволашда варикоцеле билан боғлиқ репродуктив бузилишлар, микрохирургик варикоцелэктомия самарадорлиги ҳамда операциядан кейинги табиий ҳомиладорликка эришиш имкониятлари ўрганилган.

Эркаклар бепуштлиги замонавий тиббиётнинг муҳим муаммоларидан бири бўлиб, унинг ривожланишига варикоцеле, гормонал бузилишлар, яллиғланиш касалликлари ва бошқа омиллар сабаб бўлиши мумкин. Варикоцеле сперматогенез жараёнига салбий таъсир кўрсатиб, репродуктив фаолиятнинг бузилишига олиб келиши мумкин. Шу сабабли касалликни ўз вақтида аниқлаш ва самарали жарроҳлик даволаш усулларини танлаш муҳим аҳамиятга эга.

Тадқиқотнинг мақсади

Тадқиқотнинг асосий мақсади чов орқали бажариладиган микрохирургик варикоцелэктомия самарадорлигини баҳолаш ҳамда варикоцеле билан боғлиқ эркаклар бепуштлигида жуфтликларнинг табиий ҳомиладорликка эришиш кўрсаткичларини ўрганиш орқали даволаш натижаларини яхшилашдан иборат.

Тадқиқот доирасида 2005–2012-йиллар давомида Республика ихтисослаштирилган илмий-амалий урология марказида варикоцеле билан боғлиқ бепуштлик ташхиси қўйилган 2 871 нафар эркак беморда бажарилган трансингвинал микрохирургик варикоцелэктомия натижалари таҳлил қилинган.

Тадқиқотнинг илмий янгилиги

Тадқиқот давомида мояк қон томирларининг Допплер ультратовуш текшируви варикоцеленинг I даражали, ўнг томонлама ва икки томонлама шаклларини аниқлашда визуал-пальпатор текширувга нисбатан юқори диагностик аҳамиятга эга эканлиги исботланган.

Шунингдек, сперма кўрсаткичларидаги ўзгаришлар бепуштликнинг бирламчи ёки иккиламчи эканлиги, варикоцеленинг бир ёки икки томонлама жойлашуви ва унинг клиник даражаси билан доимо бевосита боғлиқ эмаслиги аниқланган.

Микрохирургик варикоцелэктомиядан кейин табиий ҳомиладорликка эришиш эҳтимоли бепуштлик тури ва жарроҳлик амалиётининг хусусиятларига қараб фарқ қилиши аниқланган.

Тадқиқот натижалари

Тадқиқот натижаларига кўра, варикоцелэктомиядан кейин иккиламчи бепуштликка эга жуфтликларда ҳомиладорлик кўрсаткичи 74,6%, бирламчи бепуштликда эса 31,9% ни ташкил этган.

Бир томонлама варикоцелэктомиядан кейин ҳомиладорлик кўрсаткичи 35,5%, икки томонлама жарроҳлик амалиётидан кейин эса 46,5% ни ташкил қилган. Бироқ ушбу икки гуруҳ ўртасидаги фарқ статистик жиҳатдан ишончли деб топилмаган.

Операциядан кейин ҳомиладорлик юзага келишининг медиан муддати 4 ойни ташкил этган. Дастлабки жарроҳлик аралашувларидан кейин варикоцеле қайталаниши 0,46% ҳолатда кузатилган. Беморлар учун ноқулайлик туғдирувчи гидроцеле асорати қайд этилмаган.

Тадқиқотнинг амалий аҳамияти

Тадқиқот натижалари эркаклар бепуштлигини ташхислашда мояк қон томирларининг Допплер ультратовуш текширувидан фойдаланиш муҳимлигини асослайди. Ушбу ёндашув варикоцеленинг айрим шаклларини аниқроқ аниқлаш ва ўз вақтида даволаш тактикасини танлаш имконини беради.

Трансингвинал микрохирургик варикоцелэктомия усули паст қайталаниш кўрсаткичи ва қулай клиник натижалари билан эркаклар бепуштлигини жарроҳлик йўли билан даволашда муҳим аҳамиятга эга.

Тадқиқот натижалари Республика ихтисослаштирилган илмий-амалий урология марказининг Фарғона ва Хоразм филиаллари амалиётига жорий этилган.

Тадқиқот ҳақида маълумот

Тадқиқот муаллифи: Юлдашев Жасур Мансурович.

Илмий раҳбар: Мухтаров Шухрат Турсунович, тиббиёт фанлари доктори, профессор.

Расмий оппонентлар: Гайбуллаев Асилбек Асадович ва Юлдашев Файзулла Юлдашевич.

Етакчи ташкилот: Андижон давлат тиббиёт университети.

Ихтисослик: 14.00.31 — Урология.

Диссертация бажарилган муассаса: Тошкент давлат тиббиёт университети.

ҲИМОЯ ҲАҚИДА ЭЪЛОН

2026 йил 19 ноябрь куни соат 14:00 да Академик В. Воҳидов номидаги Республика ихтисослаштирилган хирургия илмий-амалий тиббиёт маркази ҳузуридаги DSc.06/2025.27.12.Tib.08.01 рақамли Илмий кенгашнинг тиббиёт фанлари бўйича фалсафа доктори (PhD) илмий даражасини олиш учун диссертациялар ҳимоясига бағишланган йиғилиши бўлиб ўтади.

Биринчи ҳимоя

Юлдашев Жасур Мансуровичнинг «Эркаклар бепуштлигида микрохирургик варикоцелэктомия натижалари ва самарадорлигини баҳолаш» мавзусидаги диссертацияси ҳимояси бўлиб ўтади.

Ихтисослик: 14.00.31 — Урология.

Илмий раҳбар: Мухтаров Шухрат Турсунович, тиббиёт фанлари доктори, профессор.

Расмий оппонентлар:
Ғайбуллаев Асилбек Асадович;
Юлдашев Файзулла Юлдашевич.

Етакчи ташкилот: Андижон давлат тиббиёт университети.

Иккинчи ҳимоя

Касимов Сафожон Самукжановичнинг «Қовуқ бўйинчаси ва уретранинг простатик қисми облитерациясининг эндоскопик давоси» мавзусидаги диссертацияси ҳимояси бўлиб ўтади.

Ихтисослик: 14.00.31 — Урология.

Илмий раҳбар: Насиров Фуркат Рауфович, тиббиёт фанлари доктори.

Расмий оппонентлар:
Аюбов Беҳзод Алишерович;
Шадманов Мирзамахмуд Алишерович, тиббиёт фанлари доктори, профессор.

Етакчи ташкилот: Фарғона жамоат саломатлиги тиббиёт институти.

Zoom конференциясига уланиш ҳаволаси:

https://us06web.zoom.us/j/81084482358?pwd=NiVVITkceMZCjfmPqruQxd78QzCr8O.1

Конференция идентификатори: 810 8448 2358

Кириш коди: 495057

 

 

Диссертация авторефератини юклаб олиш:

📄 Юлдашев Жасур Мансурович — PDF юклаб олиш