Академик В. Воҳидов номидаги Республика ихтисослаштирилган хирургия илмий-амалий тиббиёт марказига Хитойнинг Шанхай шаҳридаги «Renji Hospital» клиникасидан профессор Ся Цян бошчилигидаги мутахассислар делегацияси жигар трансплантацияси бўйича қўшма дастурни амалга ошириш мақсадида ташриф буюрди.

Ташрифнинг биринчи кунида ўзбекистонлик ва хитойлик мутахассислар беморлар ҳамда қариндош донорларни биргаликда кўрикдан ўтказиб, клиник ҳолатларни муҳокама қилдилар. Шунингдек, операция хоналари, тиббий ускуналар ва зарур сарф материалларининг тайёрлиги текширилиб, режалаштирилган жарроҳлик амалиётлари жадвали келишиб олинди.

11–13 октябрь кунлари тирик қариндош донорлардан учта жигар трансплантацияси ўтказилиши режалаштирилган. Жумладан, Ўзбекистонда илк бор донор жигарининг бир қисмини лапароскопик усулда резекция қилиш технологиясини қўллаш кўзда тутилмоқда.

Ҳафта давомида Марказ хирурглари хитойлик ҳамкасблари билан елкама-елка ишлаб, жарроҳлик амалиётлари, беморларни даволаш, клиник муҳокамалар ва ўзаро тажриба алмашиш жараёнларида биргаликда иштирок этадилар.

Ҳамкорликнинг асосий мақсади — илғор хирургик технологияларни жорий этиш, маҳаллий мутахассислар малакасини ошириш ва Ўзбекистонда трансплантология соҳасини янада ривожлантириш.