Bugun O‘zbekiston Respublikasi Sog‘liqni saqlash vazirligida akademik V. Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazi boshqaruv tizimini yanada rivojlantirish va modernizatsiya qilishga bag‘ishlangan muhim ishchi uchrashuv bo‘lib o‘tdi.
Uchrashuvda Xirurgiya markazi direktori, professor Saydimurod Ibragimovich Ismoilov, shuningdek jalb etilgan xorijiy ekspertlar — bosh menejer Kim Chul So hamda boshqaruv tizimini rivojlantirish va isloh qilish bo‘yicha menejer doktor Shin Dong Yeun ishtirok etdilar. Uchrashuvni O‘zbekiston Respublikasi sog‘liqni saqlash vaziri Asilbek Anvarovich Xudayarov olib bordi.
Uchrashuv davomida xorijiy menejerlar tomonidan Xirurgiya markazi boshqaruv tizimini isloh qilish bo‘yicha ishlab chiqilgan loyiha taqdim etildi. Unda muassasaning zamonaviy, samarali va barqaror tibbiyot tashkiloti sifatida rivojlanishi bo‘yicha qarashlar va takliflar bayon etildi.
Taqdim etilgan loyiha Xirurgiya markazida shaffof va tizimlashtirilgan boshqaruv modelini shakllantirish, asosiy samaradorlik ko‘rsatkichlari (KPI) asosida boshqaruvni joriy etish, bemorlar oqimi va klinik jarayonlarni optimallashtirish, tibbiy raqamli tizimlarni rivojlantirish, xarajatlar va moliyaviy jarayonlar ustidan nazoratni kuchaytirish hamda zamonaviy xirurgiya markazi modelini shakllantirishni nazarda tutadi.
O‘zbekiston Respublikasi sog‘liqni saqlash vaziri Asilbek Anvarovich Xudayarov taqdim etilgan loyiha bilan batafsil tanishib, mazkur tashabbuslar sog‘liqni saqlash tizimini isloh qilishga qaratilgan davlat siyosatiga to‘liq mos kelishini ta’kidladi.
Uchrashuvda alohida qayd etildiki, xorijiy mutaxassislar va ilg‘or boshqaruv tajribasini jalb qilish O‘zbekiston Respublikasi Prezidentining bevosita topshirig‘i asosida amalga oshirilmoqda. Davlat rahbari mamlakat tibbiyot muassasalarining moddiy-texnik bazasini mustahkamlash, zamonaviy texnologiyalarni joriy etish va sog‘liqni saqlash tizimini modernizatsiya qilishga katta e’tibor qaratmoqda.
Vazir tomonidan barcha tashabbuslar qo‘llab-quvvatlanib, jumladan poliklinika faoliyatini takomillashtirish, statsionar boshqaruvini modernizatsiya qilish hamda zamonaviy tibbiy menejment prinsiplarini joriy etish bo‘yicha vazirlik har tomonlama ko‘mak ko‘rsatishi ta’kidlandi.
Mazkur islohotlar amalga oshirilishi Xirurgiya markazi faoliyati samaradorligini yanada oshirish, tibbiy xizmat sifatini yaxshilash, muassasaning moliyaviy barqarorligini mustahkamlash va xalqaro standartlarga mos zamonaviy boshqaruv modelini shakllantirishga xizmat qiladi.
